هەڵوێستی دەستەی سەربەخۆی مافەکانی مرۆڤ لەسەر بۆردومانەکانی تورکیا

0

نوچەنێت: تایبەت

بەهۆى بۆردوومانى فڕۆکە جەنگییەکانی توركیا سێ هاونیشتمانى شارۆچکەی شیلادزێی سه‌ر به‌ قه‌زای ئامێدى گیانیان له‌ده‌ستدا و تەرمەکانیان پارچه‌ پارچه‌ بووە. دەستەی سەربەخۆی مافی مرۆڤی هەرێمی كوردستان کوردستان-یش دەڵێت “پێویستە حکومەتی هەرێمن لە رێگەی پەیوەندییە دیپلۆماسییەکانییەوە سنوورێک بۆ ئەم هێرشکردنانە دابنێت”.

ئەمە جارى یه‌كه‌م نییه‌، کە به‌هۆى بۆردوومان و تۆپبارانكردنى توركیا خه‌ڵكى سڤیل له‌ قه‌زای ئامێدى ده‌كرێنه‌ ئامانج، ته‌نیا له‌ ئەمساڵدا حەوت هاونیشتمانی سڤیل له‌ قه‌زای ئامێدى كرانه‌ ئامانج و گیانیان له‌ده‌ستداوه‌ و سێ هاونیشتمانى دیکەش برینداربوون.

بەگوێرەی زانیارییەکان، له‌ ٧-٤-٢٠١٨ سێ براله‌ نێروه‌ى سیتو، نزیك سنوورى باكوورى كوردستان، به‌ناوى تاهێر محه‌ممه‌د له‌ دایكبووى ١٩٥٧، مه‌جید محه‌ممه‌د له‌ دایكبووى ١٩٧١ و ره‌مه‌زان محه‌ممه‌د لەدایکبووی ١٩٧٥، کە هەرسێکیان بران و خەڵکی شارۆچکەی شیلادزێن بۆ کشتوکاڵ و بیسانه‌كانى خۆیان چووبوونە‌ گوندەکەیان، بەهۆی بۆردمانەوە گیانیان لەدەستدا و ئەمڕۆ شەممە ١٤-٤-٢٠١٨، تەرمەکانیان دەهێندرێتەوە شیلادزێ و بەخاکدەسپێردرێن. هه‌رسێ هاونیشتمانى برای یه‌كن و خێزاندارن و، دانیشتووى ناحیه‌ى شیلادزێن”‌.

هەروەها به‌هۆى به‌رده‌وامى بۆردوومان و توپبارانكردنى فڕۆكه‌كانى توركیا له‌ ناوچه‌كانى سه‌ر به‌ قه‌زاى ئامێدى ، زیاتر لە ٢٠ ساڵه‌ نزیكه‌ى ٣٠٠ گوندى قه‌زاکە چۆڵكراون و خه‌ڵكى ئه‌و گوندانه‌ تەنیا بۆ کشتوکاڵ ده‌چنەوە گونده‌كانى خویان.

لە لێدوانێکی تایبەت بە نوچەنێت، محەمەد گۆمەشینی، گوتەبێژی دەستەی سەربەخۆی مافەکانی مرۆڤ لە هەرێمی کوردستان، لەبارەی بۆردومانەکانی تورکیا بۆ سەر ناوچە سنووریاکان و بوونە قوربانی هاوڵاتیانی مەدەنی رایگەیاند “بەداخەوە ئەمە یەکەم جار نییە، کە هاوڵاتیانی هەرێم دەبنە قوربانی هێرش و بۆردومانی وڵاتانی درواسێ، کە بە بیانووی جیاوازەوە هێرش دەکەن و پێویستە حکومەتی هەرێم و عێراق لەسەر ئەو پێشێلکاریانە بێنە دەنگ”.

محەمەد گۆمەشێنی ئەوەشی خستەڕوو، کە حکومەتی هەرێمی کوردستان بێدەنگە و هەم هەڵوێستەکانی جددی نین. دەشڵێت “ئێمە نازانین هێزی چەدار لەو شوێنانەی کە بۆردومان دەکرێت هەیە یان نا، چونکە لیژنەی لێکۆڵینەوەمان نەناردووە بۆ ئەو ناوچانە، تا ئەمڕۆ پێمانوایە نە دەوڵەتی عێراقی بەرانبەر ئەو دەوڵەتە سەرپێچیکارە هاتووەتە دەنگ، کە دەگوترێت ٢٠ کیلۆمەتر سنووریان بەزاندووە. 

گوتەبێژی دەستەی مافی مرۆڤ ئاماژەبەوەدەدات، کە لە هەموو بۆردومانەکان هەر هاوڵاتی مەدەنی گوندنشینەکان دەبێتە قوربانی، بەڵام دیار نییە، کە بارەگایەک یان شوێنێک هێزی چەکداری لێ بێت بکرێتە ئامانج، کە بانگەشەی بۆ دەکەن.

لەبارەی یاسای عێراق بۆ بەرگری کردن لە سنوورەکان، گۆمەشینی گوتی، بەگوێرەی یاسا لەسەر حکومەتی عێراقی فەرزە بێتە دەنگ. گوتیشی، وڵاتانی درواسێ ناکرێ بە بیانووی هێزی چەکدار و دژبەریان، مەترسی بخەنە سەر خەڵکی مەدەنی ناوچە سنووریەکان.

 محەمەد گۆمەشینی پێیوایە، پێویستە حکومەتی هەرێمن لە رێگەی پەیوەندییە دیپلۆماسییەکانییەوە سنوورێک بۆ ئەم بابەتە (هێرشکردنانە) دابنێت و پەیامی دیپلۆماسی بگەیەنێتە ئەو وڵاتانە، کە وڵاتی دراوسێین و ئەوان رێز لەسەروەری ئەو خاکە بگرن. رێخراوە نێودەوڵەتییەکان و نوێنەری وڵاتان و بەتایبەت نوێنەرەکانیان لە هەردوو وڵاتی ئێران و تورکیا، بێنەخەت و رێگری لەم هێرشانە بکەن، کە دەکرێتە سەر هاوڵاتیانی مەدەنی و زیان گەیاندن بە ناوچەکانیان. 

Share.

About Author

بوچون نوسین داخراوە.

Social Media Auto Publish Powered By : XYZScripts.com