ئامانج لە سەردانی شاندێکی پەرلەمان بۆ لای لایەنە کوردییەکان

0

نوچەنێت

شاندێکی پەرلەمانی عێراق، سەردانی بارەگای مەکتەبی سیاسی کۆمەڵی ئیسلامی و یەکێتی نیشتمانی کوردستان و یەکگرتووی ئیسلامی کرد. ئامانج لەسەر سەردانەکەشیان ئاشکرا کرد.

بەگوێرەی زانیارییەکان، دوای کۆبوونەوەیان لەگەڵ کۆمەڵی ئیسلامی، شاندەکەی پەرلەمانی عێراق سەردانی بارەگای مەکتەبی سیاسی یەکێتی نیشتمانی کوردستانیان کرد و دواتریش لەگەڵ یەکگرتووی ئیسلامی کوردستان کۆبوونەوە.

دوای کۆبوونەوەشیان لەگەڵ مەکتەبی سیاسی یەکێتی نیشتمانی کوردستان، د. بەشیر خەلیل حەداد، جێگری سەرۆکی پەرلەمانی عێراق لە کۆنگرەیەکی رۆژنامەوانیدا، ئامانجی سەردانەکەی خستەڕوو و رایگەیاند: “سەردانەکانمان بۆ لای لایەنە سیاسییەکان لە کوردستان، دوو ئامانجی هەیە، ئامانجی یەکەم ئەوەیە پەیوەندی و لینکێک لە نێوان پەرلەمانی عێراق و لایەنە کوردستانییەکان هەبێت و پەیوەندییەکان بەهێزتر بکەین و ئاگامان لە یەک بێت و گوێمان لە بیروبۆچوونەکانی یەکدی بێت”.

بەشیر حەداد، ئامانجی دووەمیان گەیاندنی پەیامێکە بە لایەنە کوردستانییەکان و گوتی “پەیامەکەمان ئەوەیە بۆ ئەوەی ئێمە لەوێ بەهێزبین و لە بەغدا بتوانین مافەکان بەدەستبهێنین و داکۆکی لە هەموو مافە رەواکانی میللەتی کورد و هەرێمی کوردستان بکەین. پێویستیمان بە پشتگیری ئەوان هەیە، پێویستیشمان بەوەیە لایەنەکان لە کوردستان لە یەک نزیک ببنەوە و هاوئاهەنگی و لێکتێگەیشتن لە نێوانیاندا هەبێت، تا چەند ئەو لێکتێگەیشتنە لەنێوان لایەنەکان هەبێت و یەکڕیزبن، ئێمە ئەوەندە لە بەغدا بەهێز دەبین، چونکە ئەو پەیوەندییە رەنگدانەوەی لەسەر بەغدا دەبێت”.

جێگری سەرۆکی پەرلەمانی عێراق راشیگەیاند “ئێمە وەکو نوێنەری میللەتی کوردین لە بەغدا لە هەوڵداین پەیوەندییەکی باش لەگەڵ لایەنە عێراقییەکان دروستبکەین، چ لایەنە شیعەکان و چ لایەنە سوننەکان، ئەمەش وادەخوازێت پێشتر پەیوەندییەکانمان لەگەڵ لایەنە کوردستانییەکان بەهێز بکەین و ئاڵوگۆڕی بیروڕا بکەین”.

بەشیر حەداد، دەڵێ: “پێویستە ئێمە لە بەغدا لە بیرکردنەوەی و تێڕوانین و سیاسەتی لایەنە کوردستانییەکان تێبگەین تاوەکو ئێمە لە بەغدا تووشی خەجاڵەتی نەبین، لایەنە سیاسییەکانی کوردستانیش پێویستیان بەوە هەیە بزانن لەناو پەرلەمانی عێراق چ دەگوزەرێت و لایەنە سیاسییە عێراقییەکان چۆن بیر دەکەنەوە و پەیوەندییان لەگەڵ ئێمە چۆنە، بۆ ئەوەی ئەوانیش لێرە سیاسەتی خۆیان و پەیوەندییان لەگەڵ لایەنە عێراقییەکان بەو شێوەیە دابڕێژنەوە”.

Share.

About Author

بوچون نوسین داخراوە.

Social Media Auto Publish Powered By : XYZScripts.com