حەشدی شەعبی دوو رێگەی لەبەردەمە

0

ئەسعەد مورادی

شارەزایەکی سیاسی رایدەگەیەنێت، عیراقی دوای قاسمی سولەیمانی هەرگیز وەک پێشتر نابێتەوە. دەشڵێت ”حەشدی شەعبی ئێستە وەک دوو ڕێگەیان لەبەردەمە”.

حەشدی شەعبی لە دوای کوژرانی قاسم سولەیمانی و ئەبومەهدی موهەندیس لە لایەن ئەمریکاوە توشی شێواوی بێ سەرک بوون و پێدەچێ نەتوانن بەوشێوازە بەردەوام بن و توشی لێکترازان و بەریەککەوتنی ناوخۆ و دەرەکی ببن و لە ئەنجامدا هەڵوەشێتەوە.

لەلێدوانێکی تایبەت بە نوچە، ئامانج نووری، شارەزای سیاسی کورد، لەبارەی عێراقی دوای کوژرانی قاسم سولەیمانی رایگەیاند: عیراقی دوای قاسمی سولەیمانی هەرگیز وەک پێشتر نابێتەوە، کەسی تر نابێتە سولەیمانی لەروی عیلاقات و توانا و دەسەڵات و دارایی، ئەو پیاوە هەموو کاراکتەرەکانی ناوچەکەی باش دەناسی، لانیکەم لە ناوەراستی هەشتاکان بەدواوە و خاڵی لاوازی هەموویانی دەزانی و لە کاتی پێویست کارتەکانی لەسەر دەجوڵاندن لە خزمەت پلان و بەرژەوەدییەکانی ئێران. ئەوە بۆ خۆرهەڵاتی ناوەراستیش هەر دروستە، کێ بێت بتوانێ ببێتە ئەو، زەحمەتە.

ئامانج نووری دەشڵێت، نەمانی تارمایی سولەیمانی بەسەر کەسایەتی وکاراکتەرەکان لەعیراق، وابەستەیی هەموو ئەوانە بە ئێرانی دوای سولەیمانییەوە، تەواو لاواز دەکات و کورد وتەنی بایدەدەنەوە و لە ئەنجامدا رۆڵ و کاریگەری ئێرانیش وەک جاران نابێت. گوتیشی ”رەنگە ئێرانیش ئەوەی پێ هەزم نەکرێ و فشاری گەورە بێنێ و تەسفیاتی زۆرێک لەو دەموچاوە هەڵگەڕاوانە بکات”.

لەبارەی چارەنووسی حەشدی دوای سولەیمانی و موهەندیس ئامانج نووری گوتی ”حەشدی شەعبی ئێستە وەک هەتیوکەوتوو وایە، کە ئەمە دەکرێ باشترین وەسف بێت بۆیان. دوو ڕێگەیان لەبەردەمە، خزانە نێو سوپای عیراق بە رێسا ئەمریکی وعیراقییەکان، کە زۆربەیان بە تەمەن و ناسنامە و بڕوانامەی سەربازیی رەت دەکرێنەوە و تەهمیشن، یان پاڵدانە پاڵ پلانەکانی ئێران لە عیراق، کە ئەوەش مانای بەرکەوتن بەرۆکێت و ئاگری چەکە ئەمریکییەکانە.

ئەو کەسایەتییە سیاسییە پێیوایە، کە ئێران هەر لە ئێستەوە دەست و پەنجەی لە عیراق کورت بۆتەوە و قورسایی کەمیکردووە، بۆیە هەر زوو کەوتوونەتە پەیوەندی و فشار بۆ سەر حەشد و دەسەڵاتدارانی عیراق. دەشڵێت ”لەو بڕوایەدام ناچاربن بۆ رەواندنەوە و ترس شکاندنی دارودەستەکانیان راستەوخۆ بێنە عیراق، بەڵام کەس ناتوانێ ببێتەوە بە قاسم سولەیمانی”.

Share.

About Author

بوچون نوسین داخراوە.

Social Media Auto Publish Powered By : XYZScripts.com